Познати историски и влијателни личности чии гробови никогаш не се откриени

фото: Shutterstock, ilustracija / wikipedia

Неколку големи потраги по гробници сè уште траат бидејќи местата каде што се закопани некои од најпознатите историски лица се уште се мистерија.

Кога, пред девет години, археолозите потврдија дека гробницата на англискиот крал Ричард Трети се наоѓа под паркинг во Лестер, тие конечно можеа да стават крај на долготрајната потрага по една од најбараните гробници во свет.

Сепак, некои големи потраги по гробници сè уште траат бидејќи местата каде што се закопани некои од најпознатите историски личности сè уште се мистерија.

КЛЕОПАТРА

Набргу откако Август и неговите легии го нападнаа Египет во 30 п.н.е., енигматичната кралица на Нил си го одзеде животот со труење. На нејзината смрт и претходеше смртта на нејзиниот љубовник, римски државник и воен водач Марк Антониј.

Античкиот грчки историчар, биограф и есеист Плутарх пишува дека овие двајца љубовници биле погребани во прекрасна кралска гробница во близина на Александрија, а приказната завршува тука, оставајќи им голема мистерија на археолозите. Некои веруваат дека мавзолејот завршил на дното на морето по земјотресите што ја погодиле оваа област во четвртиот и осмиот век и ја смениле топографијата на Александрија. Други тврдат дека двојката сигурно била погребана во близина на локалитетот Тапосирис Магна, антички храм исполнет со десетици гробници и мумии.

АЛЕКСАНДАР ВЕЛИКИ

Александар Велики починал во Вавилон во 323 година п.н.е. Во согласност со неговата слава, покојниот крал воин бил ставен во златен саркофаг и на крајот бил однесен во Александрија. Неговото тело беше преместено во мавзолејот неколку години подоцна, каде што стана античка туристичка атракција. Јулиј Цезар и Август му оддадоа почит, а Калигула наводно му го украл оклопот за време на посетата на гробот во 1 век од нашата ера. Околу 199 година, римскиот император Септимиј Северус ја скрил гробницата и целата трага од неа е изгубена таму, а досега околу 150 експедиции се обиделе да ја пронајдат.

Повеќето истражувачи веруваат дека гробот на Александар сè уште е некаде во Александрија, додека некои веруваат дека можеби е преместен во Грција, Венеција или на некоја друга локација во Египет, пишува „Кафенисање.рс“.

АТИЛА ХУНСКИ

Лидерот на Хуните, славниот Атила Божјиот камшик, неславно го загуби животот во 453 година, кога наводно се онесвестил пијан на неговата прва брачна ноќ и се задушил со крв од носот. Воините на Атила му оддадоа почит на својот водач со ден на жалост и погребни игри пред да го закопаат во три ковчези - еден златен, еден сребрен и железен. Атила беше погребан во тајност, а несреќните затвореници кои го ископаа беа убиени за да спречат грабеж на гробот. Иако се верува дека гробот се наоѓа некаде на тлото на денешна Унгарија, сè уште не се пронајдени траги, па се сомнева дека ковчезите биле украдени во годините откако бил погребан.

ВОЛФГАНГ АМАДЕУС МОКАРТ

Кога славниот композитор починал од мистериозна болест во 1791 година, неговото тело било ставено во дрвен ковчег и закопано во необележана масовна гробница на гробиштата Свети Марко во Виена. Таму лежел неколку години, сè до почетокот на 19 век, кога, во согласност со тогашната практика, најверојатно бил уништен за да се направи простор за ново починати, а локацијата каде завршиле остатоците останала непозната.

Потенцијалното парче од телото на Моцарт повторно се појави благодарение на гробарот вработен на гробиштата Свети Марко, кој тврдеше дека го отстранил черепот на композиторот во 1801 година откако го обележал со метална жица кога бил прв погребан. Черепот е предаден на Меѓународната фондација Моцартеум во Салцбург во 1902 година, но ДНК анализата до денес не успеа да докаже дали навистина му припаѓа на Моцарт.