Антибиотици и пробиотици- која е нивната врска?

Антибиотиците се лекови кои се често употребувани во многу медицински третмани, особено кога се користат против бактериските инфекции. Доколку се користат правилно, антибиотиците можат да спасат живот. Антибиотиците дејствуваат на тој начин што или ги убиваат бактериите или  го стопираат нивното репродуцирање.

Сепак освен против  „лошите“ бактерии, антибиотиците, исто така, имаат тенденција да влијаат и на „добрите“ бактерии, неопходни за одржување на нашиот имунолошки систем. Малкумина знаат дека 50% од имунолошкиот систем се наоѓа во нашиот дигестивен тракт. Исто така, треба да знаеме дека гастроинтестиналниот тракт е комплексен екосистем во чија микрофлора има над 400 бактериски видови. Мал дел од нив се наоѓаат во желудникот и во тенките црева, но најголем дел се во дебелото црево. Тие го помагаат варењето на храната, учествуваат во синтезата на одредени витамини и во метаболизирањето на некои лекови, ја овозможуваат функцијата на цревата и го зајакнуваат имуниот систем.

Но, во исто време, треба да бидеме свесни и за несаканите ефекти од користењето на антибиотиците. Покрај создавањето антибиотска резистентност, едно несакано дејство е дијарејата, која се појавува речиси кај еден од тројца кои користат антибиотици. Ова се должи токму на фактот што антибиотиците ги убиваат „добрите“ бактерии во нашиот дигестивен тракт.

Голем број медицински истражувања покажуваат дека користењето на пробиотиците („добри“ бактерии), паралелно со примањето на  антибиотици, помагаат во надополнување на одредени корисни бактерии чиј број е драстично намален поради несаканото дејство на антибиотиците. Истите истражувања покажуваат дека луѓето кои примале терапија на антибиотици и пробиотици имаат 42% помали шанси да добијат дијареја.

Реномираното британско списание „Scientist Direct“ објави медицинско истражување кое било извршено на над 30 пациенти заболени од инфекција на Helicobacter pylori.За да ги проучат ефектите на пробиотиците (во кои се содржеле Lactobacillus acidophilus и Bifidobacterium bifidum)врз цревната микрофлора која е под антибиотичка терапија, ,пациентите биле поделени во три групи, седум дена пред започнување на нивната терапија.

Првата група примала плацебо производ од првиот сè до петнаесеттиот ден. Втората група примала плацебо производ од првиот до седмиот ден и пробиотик од осмиот до петнаесеттиот ден. Третата група примaла пробиотици од првиот сè до петнаесеттиот ден. Овие пациенти донирале примероци од фецес на анализа на првиот, седмиот, дванаесеттиот, седумнаесеттиот и дваесет и седмиот ден од истражувањето.

Резултатите покажале дека пациентите од првата и од втората група имале значително зголемување на факултативната анаеробна компонента во микрофлората меѓу првиот и седмиот ден. Во првата група, бројките останале високи сè до дваесет и седмиот ден, но во втората група бројките значително се намалиле меѓу седмиот и дваесет и седмиот ден, кога нивото на анаеробната компонента се вратила во нормала. Во третата група нивото на факултативната анаеробна компонента останало стабилно низ целиот процес на истражување.

Од резултатите може да се види дека пробиотиците влијаат врз состојбата на цревната микрофлора кога сме под дејство на антибиотичка терапија. Од добиените резултати произлегува и препораката дека пробиотиците треба да се користат во текот на 72 часа од почетокот на антибиотичката терапија, но и да се продолжи со нивно користење една до три недели по прекинот на терапијата.

Покрај пробиотиците, кои треба да бидат воспоставени како надополнување на антибиотичката терапија, во регулирање на проблемите со дијарeјата и констипацијата, исто така, се препорачува пробиотиците да се комбинираат со пребиотици (храна за „добрите“ бактерии), потоа цинк (кој го ублажува интензитетот и го намалува времетраењето на дијарејата  и го засилува имунолошкиот систем), витамини од групата Б (поточно витамин Б6 кој придонесува за нормален метаболизам на протеините и гликогенот), како и екстракти од камилица и нане кои се користат во традиционалната медицина и имаат позитивен ефект врз стомачните тегоби. (прочитај повеќе на http://www.probalans.mk).

М-р по фармација Кирил Пецевски

фото: freepik.com