Забава // Занимливости

Ја сметаат за света и лековита: Врела река убива сѐ што ќе ѝ се најде на пат

03 Ноември, 2022

Не е тешко да се погоди во кој дел од светот се наоѓа

Во централниот дел на амазонската прашума во Перу, се наоѓа река што врие или Шанај темпишка, чија вода достигнува неверојатна температура од 93 степени. Во оваа река можете да сварите јајце, а ако ја ставите раката во неа, за само неколку секунди ќе добиете сериозни изгореници.

Опкружена е со обоени камења и богата вегетација висока до 18 метри, а локалното население верува дека е света река со лековита моќ. За реката што врие во Јужна Америка се раскажуваат бројни легенди.

Модерната наука ја „откри“ оваа река за време на експедицијата спроведена во 2011 година, предводена од Андрес Рузо.

Овој експерт за топли извори тргнал со автомобил низ прашумата од градот Пукалпа, возејќи околу два часа. После тоа 45 минути веслал со кану, а уште еден час се пробивал низ шумата за да стигне до Шанај Темпишка.

Реката ја чува шаман од скриениот духовен центар Мајантујаку, кој му дал дозвола на Рузо да ја испита водата и го однел по нејзиниот шесткилометарски тек, пренесува punkufer.dnevnik.hr.

Реката на делови достигнува длабочина од околу пет метри. Меѓутоа, температурата на водата варира од 48 до 93 Целзиусови степени, а калта покрај нејзиниот брег е толку жешка што не можете да одите по неа со боси нозе.

Високите температури уништуваат сè што ќе и се најде на патот, па не е чудно што е полн со тела на мали животни како жаби.

Реките што вријат не се невообичаени во светот, но тие обично се наоѓаат во близина на вулкани. Шанеј Темпишка е посебна река бидејќи најблискиот вулкан е оддалечен од неа 640 километри.

Иако потеклото на нејзиното формирање сè уште се истражува, научниците претпоставуваат дека водата продира во земјата, таму се загрева и потоа повторно излегува низ пукнатини.