Колку крлежот е всушност опасен и што треба да направиш ако дојде до каснување?

Ако си во добра форма и без хронични болести, шансите еден крлеж сериозно да те загрози се мали – но не и непостоечки. 

Овие суштества можат да пренесат опасни болести како лајмска болест, анаплазмоза и бабезиоза. 

Кај повеќето луѓе симптомите се поблаги – температура, малаксаност, болки во зглобови. Но, ако не се лекуваат на време, може да дојде до сериозни последици – воспаленија на зглобови, мозочни обвивки, срце... Со други зборови, крлежот не треба да се занемари.

Што да направиш веднаш?

Прегледај го целото тело, особено делови богати со крвоток – препони, под пазуви, зад уши. Ако забележиш „нова бенка“, провери дали се движи.

Заборави на „бајките“ – масло, сапун, палење кибрит. Тоа не делува. Крлежите буквално дишат на задниот дел и нема да се „задушат“, туку може да исфрлат бактерии директно во крвта.

Земи пинцета – најдобро специјална за крлежи, но ќе послужи и обична. Фати го што поблиску до кожата и полека извлечи, без вртење. Ако дел остане внатре – не е страшно, ќе излезе како трнче.

Потоа?

Исчисти ја раната со алкохол и зачувај го крлежот во тегла со капак. Однеси го во здравствена установа каде може да се тестира дали бил заразен. Ако е, лекарот ќе знае дали и кога да ти препише антибиотици – по можност во првите 72 часа.

Кога мора кај лекар?

Ако се појави температура, болки во мускули и зглобови, главоболка, или црвенило во форма на концентрични кругови (карактеристичен знак на лајмска болест) – веднаш на лекар.

На кратко

Крлежот не е крај на светот, но ниту ситница за игнорирање. Извади го внимателно, зачувај го, следи ги симптомите – и заборави на „дедини совети“ од 1976 година. Крлежот знае што прави, но сега знаеш и ти.