Ја доживеал трагичната судбина на децата бегалци, поради обвинение лежел во затвор: Животната приказна на актерот Ристо Шишков, во негова чест се одржува Фестивал на камерен театар
Традиционално фестивалот на камерен театар „Ристо Шишков“ почнува на 08 септември, Денот на независноста на нашата земја. Претставата „Црна дупка“ од Горан Стефановски, во режија на Љупчо Ѓоргиевски, ќе го отвори 32. Меѓународен фестивал на камерен театар „Ристо Шишков“ во Струмица, вечерва во 20 часот во Центарот „Антон Панов“. Фестивалот ќе се одржува до 13 септември.
Ристо Шишков е истакнат македонски филмски и театарски глумец, кој е роден на 23 март 1940 , а починал на 17 јули 1986.
Ристо Шишков е роден во 1940 г, во селото Мрсна, Серско, Егејска Македонија, во ситуирано трговско семејство. Татко му Васил и најстариот вујко лежеле 4 години затвор на Крит. Во 1942 година Ристо ја доживува трагичната судбина на децата-бегалци. Преку Бугарија во 1945 година неговото семејство доаѓа во Струмица, каде тој се школува.
Имал првична намера да студира атомска физика, но наеднаш се премислува, па во 1962 година дипломира на Театарската академија во Белград, на отсекот за глума. По двегодишната работа во Југословенскиот драмски театар во Белград, Шишков доаѓа во Скопје и од 1 октомври 1964 година станува член на Драмата на Македонскиот народен театар. Играл во 54 театарски претстави, снимил 11 филма (во дванаесеттиот, „Води“, неговата ролја е преснимена), пет телевизиски драми и три телевизиски серии, повеќе радиодрами. Добитник на една театарска награда на МТФ „Војдан Чернодрински“ во Прилеп (1977 година) за улогата во претставата „Крчма под зеленото дрво“.
Во 1979 е обвинет во навреда на српски и хрватски артисти, исто како и на Тито. Обвинет како националист, сепаратист и хегемонист на 15 јануари 1980 заминува во затвор. По боледување умира на 17 јули 1986 година во Скопје.
Во негова чест, од 1992 година во Струмица се одржува Фестивалот на камерен театар „Ристо Шишков“. Син на Шишков е познатиот македонски глумец Васил Шишков, кој почина на 21 -ви декември 2014 година.
