Даниел Мојсов: Имаме квалитетен тим, но тоа мора да се потврди на натпреварите, Академија Пандев прв тест

Брегалница денеска гостува кај Академија Пандев во Струмица, мина успешен подготвителен период со шест одиграни натпревари, од кои четири победи и две ремија, и притоа со само еден примен погодок, и вкупна гол-разлика од 10-1.

 Капитенот Даниел Мојсов вели дека се минати успешни подготовки, но сега сето тоа треба да се потврди на терен...

„Подготовките поминаа во најдобар ред, мислам дека реализиравме успешен подготвителен период и имавме добри резултати на пријателските натпревари. Максимално сме подготвени за почетокот на првенството“ - вели Мојсов и дополнува:

„Ако компарираме со минатата година, мислам дека сега имам поквалитетна екипа, но тоа секако треба да се покаже на терен. Одиме чекор по чекор, натпревар по натпревар и верувам дека можеме да се избориме за место меѓу првите четири екипи во лигата. Само заедно како целина можеме до големи резултати. Кога напаѓаме да напаѓаме заедно, кога се браниме да се браните сите заедно. Нападот почнува од одбраната, а одбраната од нападот!“

Желбите се денеска во Струмица освојување на трите бода...

„Посакуваме од Струмица да се вратиме со три бода. Ја респектираме Академија Пандев, имаат одлична екипа но ние имаме свои планови и цели, а тоа се да почнеме квалитетно во новата сезона и да ги запишеме првите бодови“ - вели капитенот Мојсов.

Натпреварот меѓу Академија Пандев и Брегалница во 1. коло од ПМФЛ се игра денеска (7. август) со почеток од 17:30 часот во Струмица со пренос на Спортклуб 2.