Ѓоковиќ официјално влезе во фудбалот, стана ко-сопственик на француски клуб

Добро е познато колку Новак Ѓоковиќ го сака фудбалот, а сега и официјално стана дел од „најважната споредна работа на светот“.

Како што објавија светските медиуми, најдобриот тенисер на сите времиња стана ко-сопственик на францускиот второлигаш Ле Ман.

Српскиот тенисер често се гледа на фудбалски натпревари низ цела Европа и светот, често самиот трча по топката, а познато е и дека има „свој“ клуб во речиси секоја голема лига.

Тој навива за Црвена Ѕвезда, но ги следи и Милан во Италија, Реал Мадрид во Шпанија, Монако во Франција, Бенфика во Португалија...

Покрај Ѓоковиќ, акции во клубот имаат и поранешните возачи на Формула 1, Фелипе Маса и Кевин Магнусен.

Овој град на северозападот од Франција е најпознат по познатата трка со автомобили „24 часа Ле Ман“, но има и респектабилен фудбалски клуб, кој минатата сезона обезбеди враќање во Втората лига на Франција (Лига 2).

Прекарот на клубот е „Музичарите“ (Les Mucistes), тие се нарекуваат и „Крв и злато“ (Les Sang et Or).

Бразилците се новите сопственици

Медиумите известуваат дека новите сопственици на овој клуб се бразилскиот бизнисмен Георгиос Франгулис, основач и извршен директор на компанијата OAKBERRY, и бразилската инвестициска фирма OutField, и дека Ѓоковиќ, Маса и Магнусен ќе им се придружат како инвеститори и советници. Франгулис ќе биде и директор за брендирање, работејќи заедно со долгогодишниот менаџер на клубот Тиери Гомез за да ги подобрат перформансите и глобалниот профил на клубот.

Нивната визија е да го искористат богатото наследство на градот во мотоспортот и да го комбинираат со фудбалот. OutField има долгогодишно искуство во управувањето со професионални бразилски клубови како Коритиба.

FOTO: EPA/NEIL HALL EDITORIAL USE ONLY