Интересна мапа открива која е „работа од соништата“ во различни земји: Еве што вели за Македонија

Веб-страницата Jobseeker објави интересна мапа која открива кои работни места од соништата се во земјите ширум светот, а интересно е што се работи и за Македонија.

Нивното истражување ги открива аспирациите за кариера на оние кои бараат работа и вработените кои размислуваат за промена. Со анализа на обемот на меѓународно пребарување за најпопуларните пребарувања за работа, тие ги открија 10-те најпопуларни работни места од соништата ширум светот.

Тие, исто така, ги разделија своите резултати по локација за да ги откријат најпосакуваните работни места во секоја земја и континент.

Во Европа, манекенството е најбараната професија, претставувајќи го претпочитаниот избор за кариера во 25 земји, вклучувајќи ги Франција, Германија, Италија и Шведска. Пилотот се најде на врвот на топ листите во 9 земји, вклучувајќи ги ОК и Ирска, додека жителите на Молдавија можеби биле под влијание на гледање премногу детективски драми.

Кога зборуваме за Македонија, работата од соништата е професијата пилот, додека Хрватска и Србија се на исто ниво со повеќето земји во Европа - каде манекенството е најбарано. Во Црна Гора тоа е сè уште работа на музичарите.

Покрај Македонија, земјите каде пилотирањето е „работа од соништата“ според картата се Португалија, Шпанија, Полска, Ирска и Велика Британија.

Анализирајќи ја глобалната мапа, покрај горенаведеното, се издвојуваат и занимањата на стјуардесите, блогерите, инфлуенсерите, фотографите и наставниците.