Никола Матлиески е изборот на Голден Арт КЛ7 за шеф на стручен штаб

Тренер со селекторско педигре од национални селекции на Македонија е изборот на Голден Арт КЛ7 за шеф на стручниот штаб во следните две години. Никола Матлиески, првиот асистент на селекторот на сениорскиот национален тим на последните две големи натпреварувања, Данило Брестовац, ќе го предводи проектот чија полтитика е создавање и давање шанса на млади македонски ракометари.

Стружанецот со највисоката тренерска лиценца во светот на ракометот - Мастер коуч, Никола Матлиески, својата играчка кариера ја стартуваше во матичната Струга, за потоа да премине во скопскиот суперлигаш Пролет каде што релативно млад ја заврши кариерата како играч. Од 2007-ма година ја стартува својата кариера како тренер во јуниорските екипи на Пролет и Металург, па преку сениорскиот тим на Металург 2 повторно се враќа во клубот во кој ја стартуваше истата, ракометниот клуб Тинекс Пролет. По четири поминати години во Тинекс Пролет, во кои клубот перманентно растеше и се развиваше, и во континуитет обезбедуваше излез во европските купови, паралелно извршувајќи повеќе функции во националните тимови на нашата држава застанува на чело на еден од најдобрите проекти за млади категории во Македонија, Голден Арт КЛ7.

- „Доаѓам во средина во која се негува работата со млади македонски ракометари, клуб кој инвестира во создавање на услови во кои нашите млади играчи ќе можат правилно да се развиваат и нуди можност истото тоа да го покажат на терен. По природа сум голем работник, максимално посветен на ракометот и можам да ветам многу работа, тренинг, посветеност во следните години. Нашата цел не е само првиот тим, каде што клубот има голем играчки потенцијал, туку и содзавање на респектабилна база на млади играчи и тренери во младите категории. Благодарност до раководството на Голден Арт КЛ7, кое има визија да работи за доброто на македонскиот ракомет, за довербата која со максимална посветеност во периодот кој следи ќе се трудам да ја оправдам“ – изјави новиот тренер на Голден Арт КЛ7, Никола Матлиески.

Во периодот кој претстои Голден Арт КЛ7 заедно со новиот тренер ќе го формира стручниот штаб кој ќе работи со тимот и во зависност од потребите ќе ја зголеми конкуренцијата во играчкиот кадар. Голден Арт КЛ7 и во следните години ќе се потпира на политиката на ангажман и развој на исклучиво македонски ракометари.