Постојат два вида на луѓе - муви и пчели! На кој вид припаѓате вие? Лекција од Пајсиј Светогорец

Старецот Пајсиј од Света Гора, еднаш бил запрашан: 

„Татко, вие постојано ни велите да размислуваме позитивно. Би сакале да не советувате како да се справиме со следниов проблем: Луѓето често доаѓаат кај нас и велат дека некои свештеници земаат многу пари за да ги извршат Светите Тајни, велат дека пушат и седат во таверни, па дури и велат дека некои свештеници се вмешани во неморални постапки, генерално, жестоко ги обвинуваат и презентираат докази за тоа. Што треба да им одговориме на луѓето што го обвинуваат свештенството?“

Старецот полека почна да зборува:

„Од искуство знам дека луѓето се поделени во две категории. Трета категорија не постои; луѓето припаѓаат или на едната или на другата.

Првите потсетуваат на мува.
Главната карактеристика на мувата е тоа што ја привлекува нечистотијата. Кога, на пример, мува ќе се најде во градина полна со цвеќиња со прекрасен мирис, таа дури нема да ја забележи и ќе застане на нечистотија што ќе ја најде на земја. Таа ќе започне да кружи наоколу и ќе се чувствува пријатно во смрдеата. Ако мува може да зборува, а вие да ја замолите да ви покаже ружа во градината, таа ќе ви одговори: Не знам како изгледа ружата. Знам само каде да најдам ѓубре, кал.
Постојат луѓе кои потсетуваат на мува. Луѓето кои припаѓаат на оваа категорија се навикнати да размислуваат негативно и секогаш бараат лоши страни во животот, омаловажувајќи и отфрлајќи го присуството на доброто.

Втората категорија се оние кои потсетуваат на пчела, чија главна карактеристика е да бараат нешто слатко и пријатно за да слетаат на него. Кога пчела ќе се најде во просторија полна со нечистотија, а само парче бонбона во аголот, ќе ја игнорира целата таа нечистотија и ќе слета на бонбоната. Ако побарате од пчела да ви покаже каде е ѓубрето во градината, таа ќе ви одговори: Не знам. Можам само да ви кажам каде да најдете цвеќиња, слатки, мед и шеќер.

Таа знае само за добрите работи во животот, додека лошите се непознати за неа. Ова е друга категорија, луѓе кои имаат позитивни мисли и ја гледаат само добрата страна на нештата.Тие секогаш се обидуваат да го прикријат злото за да ги заштитат своите соседи; напротив, луѓето од прва категорија се обидуваат да го разоткријат злото и да го изнесат на површина.

Кога некој ќе дојде кај мене и ќе почне да обвинува други луѓе, тој ме става во тешка ситуација и му го давам овој пример. Потоа му велам да одлучи во која категорија сака да припаѓа, за да може да најде луѓе од ист тип и да се дружи со нив “, објасни мудриот старец.

(Извадок од книгата „Солзи за светот - старец Тихон, старец Порфириј, старец Пајсиј“)