„Арс Ламина“ со четири награди од Македонската асоцијација на издавачи
Издавачката куќа „Арс Ламина“ се закити со четири награди од Македонската асоцијација на издавачи (МАИ), кои беа врачени денеска, за време на Саемот на книгата во СЦ „Борис Трајковски“. На шестото издание на наградите на МАИ, кои се доделуваат на најдобрите книги, издавачи и автори меѓу двете саемски изданија, „Арс Ламина“ освои едно прво, две втори и едно трето место.
Во категоријата за најдобра едиција првото место го освои „Целокупно творештво за возрасни на Оливера Николова“, во издание на „Арс Ламина“. Во овој проект се вклучени десет тома со 12 книги за возрасни на Николова. Книгите се во ново руво и со нови поговори од значајни македонски професори, книжевници и писатели.
Сликовницата „Ши, ѕифри, копчи“ од Владимир Лукаш со илустрации на Наталија Лукомска, која е во издание на „Либи“, дел од „Арс Ламина – публикации“, се најде на второто место во изборот за најдобра книга за деца.
Во категоријата за најкреативно издание „Арс Ламина“ освои две награди: второ место за новите боенки Fingerprint Art, со кои децата создаваат уметност со отпечатоци од прсти и третата позиција за сликовницата „Игра со придавки“ од авторката Оливија Георгиевска, со илустрации на Јована Велинова-Трајанова.
За најдобрите помеѓу двете изданија на Саемот на книгата, одлучи жири во состав: Весна Дамчевска (новинарка за култура), Сашо Димовски (книжевник и театролог) и Никола Војнов (графички дизајнер). Тие избраа победници во седум од осум предвидени категории.
Издавачката куќа „Арс Ламина“, под својот импринт „Арс Либрис“, неодамна го реобјави целокупното творештво за возрасни од Оливера Николова. Станува збор за книгите: „Куклите на Росица“ (со поговор од Елизабета Баковска), „Тесна врата“ (поговор Кица Колбе), „Куќичка“ (поговор Румена Бужаровска), „Тромбот“ (поговор Владимир Мартиновски), „Адамовото ребро“ (поговор Калина Малеска), „Збогум Вано, Ванке...“ (поговор Јелена Лужина), „Пешаци по црни полиња“ (поговор Гоце Смилевски), „Белиот чад“ (поговор Никола Гелевски), како и „Вежби за Ибн Пајко“ (поговор Катица Ќулавкова) во исто издание со „Песот со тажен поглед“ (поговор Давор Стојановски) и „Лева комора“ (поговор Владимир Јанковски) во исто издание со „Кадифената покривка“ (поговор Оливера Ќорвезироска).
Овие книги се дел од големиот проект „Македонски книжевни класици“ на „Арс Ламина“ – во рамките на кој реобјавено е дел и од творештвото на: Блаже Конески, Петре М. Андреевски, Живко Чинго, Димитар Солев, Гане Тодоровски, Влада Урошевиќ, Ѓорги Абаџиев... Овие изданија се во фокусот на трибината „Македонски книжевни класици – подарок за поколенијата!“, што издавачката куќа „Арс Ламина“ ја организира на петти мај (четврток) во 19 часот, во чест на Денот на македонската азбука и на македонскиот јазик на главната саемска бина. На настанот ќе учествуваат: Александар Прокопиев, Лидија Капушевска-Дракулевска, Елизабета Баковска и Ведран Диздаревиќ, а модераторки ќе бидат уредничките Оливера Ќорвезироска и Бисера Бендевска.
„Ши, ѕифри, копчи“ е збирка поезија за деца со многу интересна структура. Замислена е како „пеење“ на мечокот Гриз Ли, кој онеобичувајќи го светот околу себе нѐ води низ еден ден – од неговиот почеток до крајот, од будењето до заспивањето. Гриз Ли измислува зборови, наутро вели ШИ (наместо добро утро), напладне ЅИФРИ (наместо добар ден) и навечер КОПЧИ (наместо добро вечер). Измислувањето нови, непознати зборови за стари, познати нешта ја поттикнува креативноста на децата и нивната јазична слобода. Секој од зборовите на Гриз Ли, лирскиот херој на оваа книга, претставува одделен циклус со еднаков број страници. Утринските или ШИ-песните се најкуси, сонливи; пладневните ЅИФРИ-песни се подолги, со ококорени очи; и најдолги се КОПЧИ-вечерните песни, кои завршуваат со миење заби, како и секој детски ден. Главниот лик, мечокот Гриз Ли, има необични пријатели со обични имиња, но и обратно – обични пријатели со необични имиња. Сите тие се бркаат низ стиховите и римите играјќи си со јазикот, со своите палавости или со мечтите да пораснат колку што е можно побргу, впрочем, како и малите читатели на оваа несекојдневна збирка...
Во петок (шести мај), на штандот на „Арс Ламина“ и „Литература.мк“ во 18 часот ќе се одржи потпишување на сликовницата „Ши, ѕифри, копчи“ од авторот Владимир Лукаш и илустраторката Наталија Лукомска. На средбата со младите читатели тие преку цртежи ќе го претстават светот на главниот протагонист во стихозбирката – мечокот Гриз Ли.
Во новиот иновативен серијал Fingerprint Art („Уметност со отпечатоци од прсти“) во издание на „Либи“, дел од „Арс Ламина – публикации“, вклучени се четири тематски боенки со неколку теми. Изданијата се со цртежи на тема: Велигден, Божиќ, природа и лето, и се наменети за дечиња од една- до тригодишна возраст, кои сè уште го истражуваат светот главно по тактилен пат. Боенките содржат осум интересни цртежи на кои вие и вашите деца можете да создавате уметност со помош на отпечатоците од прстите. Потребни ви се и водени или темперни боички, со чијашто помош ќе ги пополните дадените скици. Цртежите можете исто така да ги исечете и да ги користите како украс на вашиот ѕид.
„Игра со придавки“ е шарена сликовница во рима со која ќе влезете во игривиот свет на придавките. Преку прекрасните слики и зборовите во боја, ќе научите како да ги препознаете и како да ги употребите. Придавките навистина лесно се учат и лесно се помнат! Книгата е наменета за децата, но и за нивните родители и за наставниците. Од неа родителите можат да им читаат на децата пред спиење, а на наставниците ќе им помогне за време на училишните часови. Изданието ќе им помогне и на нашите деца во дијаспората, да го одржат контактот со македонскиот јазик и граматиката. Сликовницата ќе биде промовирана на петти мај (четврток), во 18 часот на штандот на „Арс Ламина“. На промоцијата, покрај Георгиевска, ќе присуствува и илустраторката Јована Велинова-Трајанова, а промоторка ќе биде Александра Симова.
ПР објава
