ЕМА тврди дека вакцината на АстраЗенека е корисна

Европскатата агенција за лекови (ЕМА) продолжува да инсистира на тоа дека вакцината AstraZeneca е корисна против COVID-19, но дека продолжуваат научните проценки за можните несакани ефекти.

Директорот на ова европско тело, Емер Кук, истакна дека експертите продолжуваат да ги проучуваат можните несакани ефекти со врската помеѓу вакцината и згрутчувањето на крвта.

„Нашата позиција е дека придобивките (вакцините АстраЗенека) продолжуваат да ги надминуваат ризиците“, рече Кук, кој одржа вонредна прес-конференција за време на кризата околу вакцината, која се појави во последните неколку дена.

Имено, скоро половина од земјите-членки на ЕУ престанаа да ја користат оваа вакцина по извештајот дека има случаи на згрутчување на крвта кај лицата кои ја примиле оваа вакцина.

Според директорот на ЕМА, обвинувањата за згрутчување на крвта се загрижувачки, затоа е потребна сериозна научна проценка за тоа.

Осврнувајќи се на одлуката на земјите од ЕУ кои престанаа да ја користат оваа вакцина, директорот на ЕМА истакна дека државите имаат автономно право да одлучуваат за тоа.

„Одлуките на национално ниво се донесуваат врз основа на информации на национално ниво. Земјите-членки на ЕУ имаат привилегија да го сторат тоа “, рече директорот на ЕМА.

Според АстраЗенека, кај 17 милиони луѓе кои примиле дози во Европа, имало 37 случаи на луѓе кај кои имало згрутчување на крвта.

Светската здравствена организација (СЗО) ги повика земјите да не престануваат со имунизација со вакцината АстраЗенека откако тоа го сторија повеќе земји од Европската унија.

Патем, оваа вакцина беше трета од вкупно четири вакцини одобрени од ЕМА за употреба на територијата на Европската унија.

Претседателката на Европската комисија (ЕК), Урсула фон дер Лајен, преку нејзиниот портпарол, во средата, 16 март, рече дека „апсолутно“ ќе ја прими вакцината од компанијата АстраЗенека.

Фото: Irakli gadanidze, Reuters