И на Сан Ремо би бил атрактивен: Стилот на Мартинијан Кириловски
Комплексноста на машкиот стил не е за потценување. Бара навистина многу труд и вложување, а одржувањето континуитет без да се погреши е тешко.
Но, токму играта со парчињата облека, прикажувањето на нашето вистинско лице преку облеката, нашиот карактер, се нешта кои еден стил го прават нераскинлив со нас самите.
Врската ќе биде добра само и само ако знаеме да создадеме препознатливост во облекувањето, уникатност во идејата, допадливост и автентичност, единствени по својата содржина.
Мартинијан Кириловски од сето ова знаел што да извлече најдобро. И тоа се гледа на него без непотребно „блефирање„. Неговата одлучност во стилот го прави бестрашен стилски современ маж кој добро научил што се носи на сцена, но и надвор од неа. И сето тоа на најдобар можен начин.
Демонстрираше вистински италијански минимализам кога победи на „Макфест“ со песната „100 пати на ден“.
Но нему големите сцени не му се непознати, каго големата сцена на „Гранд“ во Србија. И што е уште подобро- тој сам знае да ја исполни сцената и со глас и со став и со стил. Ретко да киксне.
Претпочита да носи костуми кои се по најнови светски текови и кои ја следат линијата на телото без да бидат премногу тесни.
И изборот на чевли му е соодветен. Секогаш се тоа ултра модерни, кадифени или кожени. И на Сан Ремо да запаее ќе се одвои од сите.
Елеганцијата е како создадена за него и во таа насока треба да продолжи. Не е грешка и ако го „размрда“ понекогаш стилот на сцена со фармерки, мала доза на агресивност и бунтовност во облекувањето. Тој веќе не може да се „одлепи“ од неговата препознатливост, па секако облечен ќе биде токму тој.
И во спортско- елегантни варијанти е посебен. Се гледа дека е крајно внимателен и не прибегнува кон логоа на брендови кои се гледаат од еден километар.
Едноставно, знае како! Пред него има блескава музичка кариера за која се потребни и добри песни. Добриот стил веќе го има!
Небојша Толески
