Македонскиот орден со брилијанти и рубини: Како изгледа највисокото одликување во земјава?

Скоро секоја земја има свои одликувања и почести наменети за истакнати личности. На пример, Велика Британија има неколку кои се востановени од кралиците низ историјата, а денес важат за највисоки признанија. Ние го имаме фантастичниот Орден на Република Македонија — највисокото државно одликување во земјава.

Составен од орденски знак на гердан и од орденска ѕвезда. Орденската ѕвезда има основна кружно-ѕвездеста форма со димензија од 91 мм. Медалјонот на орденската ѕвезда е идентичен со орденскиот знак. Тој е во кружна форма со димензија од 57 мм. Орденскиот знак со соодветна јазолна алка висока 3,5 см е врзан за герданот на орденот. Двете форми на герданските алки, наредени со наизменична меѓусебна врска долга 80 см го сочинуваат герданот на орденскиот знак. Димензиите на алките се лимитирани од дадената должина на герданот.

Многу е интересен штитот од ѕвездата.

Тој е своевидна престава на споени брановидно-тутунови зраци кои на својот врв имаат топчест завршеток во кој се вметнати рубини. Во централното поле е вметнат соодветен рубин. Централниот медалјон околу рубинот има стилизација на флорални елементи, а стилизирани палмети го заокружуваат централниот дел на медалјонот. Маргиналниот венец на медалјонот е составен од нишка од брилијанти.

Медалјонот на орденскиот знак е идентичен со централниот медалјон на орденската ѕвезда.

Алката меѓу герданот и орденскиот знак е стилизација на гордиев (хераклев) јазол и детал од маргините на Болоњскиот псалтир.

Орденот има соодветна минијатурна лента со димензија (1,5 мм со 3,5 мм) во црвена боја со две паралелни жолти нишки. Редниот број на орденот, жигот за чистотата на металот од кој е изработен и жигот на производителот се втиснати на задниот дел на орденскиот знак и на орденската ѕвезда.

Изработен од 18 каратно злато, има родиумски третирани елементи, соодветно тониран топол емајл и скапоцени камења, во современа јувелирско - ковна техника.

Се разбира, не секој може да го има. Постои строг критериум, а се доделува на:

Најистакнати личности и правни лица кои имаат посебни заслуги во остварувањето на самостојноста, сувереноста, независноста и територијалниот интегритет на земјава, како и за вонредни резултати остварени на цивилен и воен план;

Најистакнати личности кои исклучително придонеле за развивање и зацврстување на мирољубивата соработка и пријателските односи меѓу Македонија и други држави, како и за јакнење на нејзината меѓународна положба и углед;

Владини и невладини организации, здруженија, како и поединци, кои со своето работење и дејствување постигнуваат исклучителни резултати од значење за афирмирање на Македонија во областа на науката, уметноста, образованието, стопанството, хуманоста и слично, на домашен и на меѓународен план, а особено поединци кои во областа на своето работење, односно професионално ангажирање добиле највисоки награди, односно најпрестижни признанија од меѓународно значење и

Шефови на држави и на влади, како и на други истакнати странски личности за вонредни заслуги во развивањето и зацврстувањето на пријателските односи и соработката на земјава со други држави.

Одликувани со Орденот на Република Македонија се поранешните претседатели на Македонија и реномирани институции.

Киро Глигоров во 2005 година, Прв Претседател на Република Македонија

Борис Трајковски, 2005 година- Посмртно доделен. Втор Претседател на Република Македонија, МАНУ, 2007 година за исклучителниот придонес во утврдувањето на националната политика и развојот на научната работа и уметничкото творештво, како и за поттикнување и координирање на научно-истражувачката дејност од значење за севкупниот развој и афирмација на македонската наука и држава.

Универзитет „Св. Кирил и Методиј“ во 2007 година за постигнатите исклучителни резултати во долгогодишната научна, наставна и апликативна дејност, давајќи значителен придонес за севкупниот развој и афирмација на Македонија како современа демократска држава во светот

Македонска православна црква во 2007 година за улогата како стожер на националното и духовното опстојување и како чувар и афирматор на националниот идентитет на македонското постоење

Методија Андонов – Ченто во 2011 година- Посмртно доделен. Прв Претседател на македонската држава и прв претседател на Президиумот на АСНОМ

Џорџ В. Буш 2015 година, 43 претседател на САД , за големиот придонес во градењето на пријателските односи помеѓу Македонија и САД.