Покрив што протекува, влажни ѕидови, стари прозорци: Колкав процент од населението се соочил со вакви проблеми?

Условите за живеење во домовите во последниве години се подобри за разлика од пред една деценија. Ова може да се забележи од статистичките податоци. 

Според податоците на Државниот завод за статистика(ДЗС), во 2020 година, 12 отсто од населението живеело во дом со покрив што протекува, влажни ѕидови, стари прозорци. Сепак, во минатото имало и години кога 25 отсто од граѓаните живееле во лоши услови. Со овој проблем се соочувале луѓето и во урбана и во рурална средина. Фирмите кои заменуваат врати, прозорци тврдат дека денес имаат повеќе работа и дека граѓаните сепак вложуваат за да имаат подобри услови. 

„Точно е дека има повеќе работа во однос на замена на врати, прозорци. Јас сум во овој сектор веќе 20 години, од кои 4 години имам своја фирма. Од една фирма, станавме 4, односно сите колеги си отворивме своја фирма и сите имаме многу работа. Мислам дека уште 6 фирми да се отворат, ќе имаат работа.  Порано, се мачевме да имаме само покрив над глава, а сега на 10 години реновираме, менуваме мебел. Се подобруваат условите за живеење. Пред 17 години, ние не знаевме што е ПВЦ. На една куќа работевме 2 недели за замена на прозорци, а сега за еден ден, цел кат средуваме. Ем е побрзо, ем поевтино“, вели човек од струмичко кој има фирма за ПВЦ столарија.

Мајсторите не се жалат, имаат доволно работа. И според нив, денес граѓаните имаат повеќе можности, можат да си дозволат подобро уредување на домовите за разлика од порано. 

„Има работа за реновирање на покриви, за средување на тераси. Двојно повеќе работа има за разлика од порано“, раскажува Слободан Г.  од источна Македонија.

Во 2019 година, во живеалишта со лоши услови биле 13.1 отсто од граѓаните. Во 2018 година, во вакви услови живееле 14 отсто од населението. Во 2017 година, според ДЗС процентот бил ист, 14. Во 2016 година во домови со покрив што протекува, со влажни ѕидови, стари прозорци живееле 13.5 отсто. Во 2015 година, податокот говори дека во такви услови живееле 12.9 отсто од населението. Во 2014 година, дури 15.3 отсто од населението живеело во лоши услови.  Во 2011 година состојбата била уште полоша, односно 16.7 отсто од луѓето во земјава се соочиле со истото. Во 2010 година процентот бил уште повисок. Во оваа година, ДЗС регистрирал дека 25.1 отсто од населението ги има наведените проблеми во домот.

Оние кои живееле во простор каде нема доволно светлина се многу помалку. Процентот во оваа ставка најчесто варирал меѓу 4 и 5. Во 2010 година, 8.1 отсто од граѓаните живееле во простор каде е многу темно, со недоволно светлина.