Пробиотици – природни засилувачи на имунитет во пролет

Во овој период на промена на сезоните, доаѓаат и чести настинки како последица на послаб имунитет. Кога ќе дојде пад на имунитетот, организмот го совладуваат бактерии и вируси и доаѓа до заболувања. Со цел на подобрување на имунитетот и овозможување на најдобра заштита на организмот ќе напоменеме за употребата на пробиотици.

Пролетта со сите свои убавини на разбуден жив свет, со сите свои разновидни бои и звуци, носи и зголемен број на болни во нашите аптеки. Се зголемува бројот на горно респираторни заболувања, како и бројот на разновидни гастроинтестинални нарушувања и влошувања на веќе постоечки хронични болести во општата популација. Се потенцираат алергиските манифестации на двата системи, и респираторниот и дигестивниот, зголемени се потребите за внес на витамини, минерали, течности и многу често поради појава на инфекциите има потреба од антибиотска терапија, често долготрајна, комбинирана со повеќе антибиотици и други лекови, кои сите заедно силно ја нарушуваат микробната флора во цревата, која е чувар на нашето здравје.

Правилен став кон себе и своето здравје, добра хигиена, негување на епителот на своите дишни патишта и чувањето на интегритетот на најголемиот имунолошки орган во телото – нашиот дигестивен систем, исхрана богата со витамини, пред сѐ од групата А, Б, Ц, Д внесување на олигоелементи, особено во пролет, се од непроценливо значење во превенцијата на инфекциите, односно се фактори кои го подобруваат нашиот имунитет

Поновите истражувања покажуваат дека всушност клучниот фактор за нашиот имунитет се токму пробиотиците. Тие т.н. добри бактерии живеат во нашиот дигестивен систем и се одговорни за нормално одвивање на метаболитичките процеси т.е. варењето на  храната. Одамна се знае дека нарушувањето на нивната рамнотежа доведува до дигестивни проблеми како дијареа, надуеност, гасови, опстипација итн. Меѓутоа, нивната улога во имунолошкиот систем е докажана дури неодамна и таа подразбира нивно директно учество во процесот на изградба на антителата кои се носители на имунолошкиот одговор.

Од многуте пробиотски култури кои го населуваат нашето тело најзначајни се пред сѐ неколку чија улога е и најмногу испитана (B.subtilis I-2745,L. acidophilus LA3, B. animalis ssp. lactis BLC1, L. casei BGP93). За жал мал е бројот на хранливи намирници кои содржат пробиотици, но за среќа денес постојат препарати (додатоци во исхрана) кои се комбинација токму од овие пробиотски култури. Нивната комбинација со пребиотици, недигестибилни супстанци - инулин или олигосахариди, доведува до силно стимулирање на дејството на пробиотикот. Такви синбиотици, новите генерации на пробиотици се комбинираат и со другите засилувачи на имунитетот, како што се витаминот Ц, Д, цинк и други. 

Денес е правило во светот (или барем оној дел кој има доволно ресурси), давањето на антибиотската терапија да не биде без поткрепа на организмот со соодветен пробиотски препарат. Од круцијална важност е да се постигне соодветна концентрација на пробиотикот, да е во форма која ја пребродува бариерната желудечна киселина или да е во соодветна форма која овозможува да стигне пробиотикот на целното место, односно во цревото.  Со тоа, стимулираниот имунолошки систем го спречува влегувањето на патогени и вируси во клетката, ја супримира инфекцијата, а помага во регулирање на гастроинтестиналната микорофлора.

М-р.Фарм. Лидија Пешталевска Николовска

фото: freepik