Јончевски: Победата на првата средба да ја заборавиме, не очекува тежок натпревар со Данска, но одиме на победа

Македонија е на вистинската патека во вториот круг од претквалификациите за Евро-шампионатот кој ќе се одржи во 2025 година. Во три одиграни натпревари, имаме исто толку победи.

Првиот „круг“ од групата „Д“ го завршивме на идеален начин, со победа против директниот конкурент за првото место, селекцијата на Норвешка. Во Гевгелија, ги задржавме скандинавците на неверојатни 36 поени, па сега со уште поголеми мотиви нашите момци го чекаат и неделниот натпревар. Против уште една земја од Скандинавија – Данска, во дуел кој е закажан од 19.часот, во салата „26.април“ во Гевгелија.

„Очекувам цврста игра против Данска и не треба да нè залажува фактот дека ги победивме на гостински терен. Разговаравме со момците, ни требаат свежи глави за да ја завршиме втората третина од овој циклус. Било каков кикс ќе не врати подолу. Во овие неколку денови се подготвуваме доволно и ветувам исто добра игра како и онаа против репрезентацијата на Норвешка“- вели селекторот Александар Јончевски.

Додава предводникот од клупата на нашиот национален состав уште нешто пред утрешниот дуел против селекцијата која ја добивме на гостински терен (73:70), со онаа неверојатна тројка на Ненад Димитријевиќ, кого публиката во Гевгелија нема да го види ниту на оваа средба.

„Не гледам некој изразит фаворит во овие четири селекции кои се во нашата група. Ќе ги анализираме Данците максимално, и исто така подготвени ќе се обидеме да бидеме максимално успешни и воовој ноемвриски ‘прозорец’ на ФИБА“.

Македонската кошаркарска федерација ја продолжи соработката со медиумската ТВ куќа Sportklub.

Согласно со тоа, и во наредниот период Sportklub ќе ги пренесува „во живо“ натпреварите на машката сениорска репрезентација на Македонија во вториот круг од претквалификациите за Евробаскетот во 2025 година.

Во рамките на 4. коло од групата „Д“, Sportklub ќе го пренесува и натпреварот Македонија-Данска кој ќе се игра на 13. ноември (недела) со почеток од 19.часот, во салата „26.април“ во Гевгелија.

Предвидено е преносот од овој важен дуел на „црвено-жолтите“ да се емитува на Sportklub 1 HD каналот.