АКО ВЕЌЕ „ГЛАВАМ“ ВО БАНКА, БАРЕМ НЕКА БИДЕ ЗА ДА СИ КУПАМ СТАН - голем пораст на станбените кредити, еве колку должат граѓаните

Македонските граѓани најмногу се „заглавени“ во банка за потрошувачки кредит, ама подолг период наназад се повеќе сакаат да земат кредит за купување на стан.

Така накусо изгледа најновата состојба на задолженост на домашното население, која се однесува заклучно со март оваа година, а беше претставена преку податоците на Народна банка на Македонија.

Па така, вкупниот граѓански борч по основ на потрошувачки кредити на крајот на третиот месец од годинава се доближил опасно до две милијарди евра, или прецизно, изнесува 1,949 милијарди евра. Во однос на еден месец претходно, или во однос на февруари, потрошувачките кредити се зголемени за некои скромни осум милиони евра, а се речиси на идентично ниво колку што изнесувале во декември лани, односно на крајот на минатата година.

Или, од Народната банка пресметале дека во март годинава во однос на март лани, кај потрошувачките кредити има зголемување за 5,8 отсто, односно таа е годишната стапка на раст на овие кредити, додека, пак, месечната стапка на промена е пораст од само 0,4 проценти.