Доби речиси 10 милиони евра на лотарија и не сака да остане анонимен: Сите да знаат колку сум богат

Кога ги добил парите од лотаријата, дал отказ и купил Ферари, Порше, скап часовник и омиленото кафуле

Во извлекувањето на лотаријата на 24 септември, џек пот од речиси 10 милиони евра го добил 41-годишниот Курсат Ј. од Дортмунд. Добитното лото ливче го уплатил во областа Дортмунд во Нордштад на 22 септември. Чико, како што го нарекуваат пријателите, за медиумите изјавил дека заборавил на лозот и го побарал дури кога во весникот прочитал дека е извлечен џекпотот од 9.927.511,60 евра. Победничките бројки ги споредил неговиот најдобар пријател, пишува Феникс Магазин. Тогаш му се јавил пријателот и му рекол:

- Диши длабоко. Ти не си милионер, ти си мултимилионер.

- Веднаш истрчав кај моите родители и им кажав за неверојатната победа. Едвај можев да дишам, врескајќи од среќа додека трчав низ улиците кај моите родители. Сите мислеа дека сум луд. Плачев дома. И реков на мајка ми: „Мамо, ние сме богати“.

Курсат Ј. рекол дека имал 12 години кога со родителите ја напуштил Турција и дошол во Германија. Кога пораснал, го научил занаетот во ThyssenKrupp AG, германски конгломерат познат по производство на автоделови.

- Во еден момент скршнав од вистинскиот пат, паднав во долгови и играв лотарија со години. Освоив и изгубив илјадници евра. Јас бев црната овца на моето семејство - рекол Курсат Ј.

Кога ги добил парите од лотаријата, дал отказ и купил Ферари, Порше, скап часовник и омиленото кафуле. Лотаријата редовно ги предупредува добитниците да не зборуваат за своите добивки, но на Курсат Ј. не му е грижа.

– Сакам сите да знаат колку сум богат – рече тој.

Фото: unsplash