Драматично зголемување на данокот на тутун во ЕУ: Еве колку би можеле да поскапат цигарите

Европската комисија предлага драстично зголемување на даноците на цигарите, тутунот за моткање и електронските цигари, што би можело да доведе до зголемување на цените до 258 проценти. Грција предупредува дека таквата одлука би можела да го поттикне шверцот и да ја загрози домашната тутунска индустрија и бара поблаго решение и подолг преоден период.

Европската комисија разгледува значително зголемување на данокот на тутунските производи, вклучувајќи ги традиционалните цигари, тутунот за виткање, електронските цигари и уредите за загревање тутун.

Според најамбициозниот предлог, данокот на тутун за моткање би можел да се зголеми за дури 258 проценти, додека цигарите би се оданочувале за 139 проценти повеќе од сега.

Зголемувањата се однесуваат и на електронските цигари со никотин, за кои е планирано воведување на посебен акцизен данок.

Сепак, Грција изразува загриженост во врска со овој план и предлага поумерен пристап.

Министерот за финансии Киријакос Пјеракакис на состанокот на Советот на министри за финансии на ЕУ (ЕКОФИН) истакна дека наглиот пораст на цените на тутунот би можел да го влоши црниот пазар, да ја оштети домашната тутунска индустрија и негативно да влијае на извозот и инвестициите.

Наместо сегашниот предлог, Грција бара пониски стапки, подолг преоден период и оданочување по тежина на производот, а не по единица продажба.

Министерот изјави дека искуството покажува дека ненадејното зголемување на цената на тутунските производи често води кон поголем шверц, особено во земји со сложена географска положба како што е Грција.

Европската комисија нуди три сценарија, но го поддржува она што предвидува највисоки даноци и дополнителни буџетски приходи од околу 15 милијарди евра. Според тоа сценарио:

Данокот на цигарите би се зголемил од 90 на 215 евра на 1.000 цигари;

Тутунот за валање би скокнал од 60 евра по килограм на 215 евра;

Цената на пурите би се зголемила за повеќе од 1.000 проценти, од 12 на 143 евра по килограм;

Електронските цигари би се оданочувале со 0,36 евра на милилитар течност со висока содржина на никотин, а оние со помала содржина на никотин - со 0,12 евра.

Проценките покажуваат дека кутија цигари, која сега чини 4,60 евра, би можела да порасне на околу 7 евра со новиот данок.

Комисијата ја гледа оваа мерка како начин за понатамошно намалување на потрошувачката на тутун.

Во извештајот се наведува дека повисоките цени се најефикасниот метод во борбата против пушењето, кое е намалено за 40 проценти во ЕУ од 2011 година, благодарение на повисоките даноци.

Покрај зголемувањето на акцизите, се разгледуваат и дополнителни мерки: забрана за филтри, ограничување на продажните места и постепено укинување на продажбата на цигари во малопродажните продавници, во согласност со предлозите на Светската здравствена организација.

РММ / фото фрипик