На првиот митинг по изборите: Трамп повторно тврди дека е победник

На својот прв изборен митинг по претседателските избори во САД, Доналд Трамп повторно во саботата во Џорџија тврдеше дека е победник на изборите на кои победи Џо Бајден пред скоро еден месец.

„На пат сме да победиме на овие избори“, рече претседателот на заминување пред стотици приврзаници собрани на отворено во Валдоста. "Тие ќе се обидат да нè убедат дека сме изгубиле. Ние не изгубивме", додаде тој со воодушевени извици.

И покрај обвинувањата на Трамп за изборна измама, судовите отфрлија голем број тужби поднесени од неговите адвокати низ САД.

Доналд Трамп дојде на митингот во Валдости, Џорџија, за да ги поддржи двајцата републиканци, Дејвид Пурдју и Кели Лофлер, кои на 5 јануари ќе се натпреваруваат со демократите Џон Ософ и Рафаел Ворнок за две места во Сенатот.

Трамп повторно остро го критикуваше гувернерот на таа конзервативна држава, Брајан Кемп, кој е републиканец и неговиот поранешен сојузник, повикувајќи го повторно да ги провери гласачките ливчиња од претседателските избори.

Изборниот резултат во Џорџија веќе е проверен и потврден, а Џо Бајден освои само 13.000 гласови повеќе од Доналд Трамп.

Исходот од изборите во Сенатот ќе одреди кој ќе ја контролира таа куќа. На демократите им е потребна двојна победа за мнозинството а доколку републиканците освојат дури едно место, тие ќе ја задржат контролата во Сенатот и ќе можат да ги блокираат повеќето предлози на Бајден.

Некои републиканци стравуваат дека Трамп може да им наштети на своите сопартијци зборувајќи за изборни измами на политички митинзи.

Републиканците сега имаат 50 места во Сенатот, а демократите 48 од вкупно сто места.

Фото: Tanjug/AP Photo/Evan Vucci