Ова село во Кападокија е едно меѓу најубавите села во светот: Заборавен монолит под базалтно небо испрскано со бои на кајсија и пепел
Кападокија, позната како едно од најнеобичните природни чуда на светот, со своите познати возења со балони на топол воздух, повторно доби меѓународно признание.
Ортахисар, историско село во срцето на регионот, неодамна беше вклучено на листата на Форбс на „50-те најубави села во светот“ за 2025 година.
Ова признание дополнително го потврдува статусот на Кападокија како дестинација со неспоредлива убавина и културно значење што мора да ја вклучите на вашата листа за патување во наредните месеци.
Ортахисар е исклучителна дестинација која заслужува да биде на листата со желби на секој патник во овој регион. Се наоѓа на околу шест километри од Ургуп, најголемата населба во Кападокија, и комбинира препознатлива архитектура врежана во карпата со антички замок и небо исполнето со балони.
Безвременска магија и традиционална архитектура
Зборувајќи за вулканскиот релјеф на овој регион, Форбс го опишува Ортахисар „како да излегува од земјата на Кападокија како заборавен монолит под базалтно небо испрскано со бои на кајсија и пепел“. Во текот на милиони години, дождот и ветерот ги обликувале слоевите од мека вулканска карпа, формирани од ерупциите на планината Ерџиес, Хасандаг и Гулудаг, давајќи им облик на познатите самовилски оџаци. Овој уникатен пејзаж, обликуван од природата и времето, станал заштитен знак на волшебната убавина на Кападокија.
Во самото срце на селото се наоѓа замокот Ортахисар - „куќа со оџак“ преправена како тврдина. Се смета дека е врежана уште во ерата на Хетитите и содржи пештери, гулабарници и лавиринтски тунели, и се смета за една од првите повеќекатни населби во светот. Денес е една од највисоките точки за гледање во регионот и нуди спектакуларен панорамски поглед.
Ортахисар, исто така, се одликува со прекрасни примери на традиционална кападокиска архитектура што се среќаваат околу неговата основа. Калдрманите улички, со тезги од кајсии и градини со чај со мирис на роза, се протегаат кон живописните долини.
Историски гледано, вдлабнатите простори во овие долини служеле како магацини за локални производи како што се јаболка, компири, портокали и лимони, кои биле донесени од Медитеранот. Во областа има и фасцинантни цркви и манастири, како што се црквата Сариџа, Џамбазли, Тавсанли, црквите во долината на Балкан Дереси и манастирот Халах Дереси, кои сведочат за богатото религиозно и културно наследство на Кападокија.
Земја на бајките
Атракциите на Кападокија одат далеку надвор од границите на ова село. Овој магичен регион, кој минатата година привлече повеќе од 4,37 милиони посетители во своите музеи и археолошки локалитети, нуди незаборавни искуства - од мистериозни подземни градови и цркви издлабени во карпи, до уникатни пештерски хотели кои комбинираат прекрасна архитектура со модерен комфор. Посетителите тука можат да уживаат во спа третмани во луксузните пештери на хотелот, јавање коњи меѓу карпести формации или да учествуваат во работилници за грнчарство и да создаваат свои уметнички дела.
Сето ова е надополнето со кападокиската кујна, која се потпира на турските и анадолските гастрономски традиции и локалните состојки. Традиционалните јадења, често со сочно месо во комбинација со локално овошје подготвено во глинени садови, заедно со врвни вина произведени од грозје одгледувано на вулканска почва, го прават уживањето во храната во Кападокија посебно искуство.
Неодамна, Кападокија беше вклучена во гастрономската мапа на Турција на MICHELIN, дополнително потврдувајќи го нејзиниот статус како светска дестинација, како за културата, така и за гурманите.
Фото: Freepik.comИзвор: B92.net
