За колку пари се продава Македонскиот рубин на интернет платформите?

Македонија е единствената земја во континентална Европа со рубини кои се појавуваат природно.

Скапоцениот камен рубин има тврдина 9 според таканаречената „Мосова“ скала и се наоѓа веднаш зад дијамантот, кој е на 10 – тата позиција.

Корунд претставува кристална форма на алуминиум оксид. Во неа има и  траги од железо, титаниум или хром кои му даваат различни бои. Црвениот корунд се нарекува рубин. 

На овие простори е забележан во прилепско, односно во рудникот Сивец. И тоа е единствениот скапоцен камен кој го има земјава. Неговата боја не е црвена, туку розова бидејќи рубините се забележуваат во неколку црвеникаво- розови нијанси.

Уште пред околу 100 години овде го истражувал германскиот геолог Ото Хајнрих Ернстмандорфер, кој непосредно по завршувањето на Првата светска војна издал неколку научни трудови во кои првпат се посочило дека во прилепскиот регион има регистрирано појава на минералот корунд. 

Во 2000 година, прва научна институција што го докажала постоењето на корундот била една лабораторија во Велика Британија. Неколку години подоцна, во 2006 – та, истиот резултат го документираше и лабораторијата на Природонаучниот музеј од Лондон, анализирајќи примерок однесен од неколкумина ентузијасти од Македонија.

Денес, изработувачи на накит од нашава земја го користат во нивните дела. 

Македонскиот рубин е нешто со кое земјава треба да се гордее. Го нема секаде, а многу е редок во бојата и чистината која ја има овде. 

Интересно е да се напомене дека престижни светски личности имаат добиен подарок рубин од Македонија, во вид на накит или рубин вграден во различни состави.

Македонскиот Рубин веќе се наоѓа во колекцијата со накит на холивудските актерки Дерил Хана и Кетрин Денев, вграден е во крстот на Папата Бенедикт XVI и на Папата Франциск. Го има и Емирот од Катар, но и уште многу престижни имиња од културниот и општествениот живот.

Интересено е тоа што за рубинот мора да се има дозвола за ископ и негова употреба. Многу се ригорозни правилата за да се стигне до самиот рубин. 

Но, на најголемата светска интернет платформа Ebay се продава и Македонски рубин. Се разбира, необработен и како дел од карпа. Неговата цена изнесува 350 долари, а има тежина од 289 карати.