Благословен: Јован, херојот кој спаси 20 деца од пожарот во Кочани, пречекан со громогласен аплауз и силни прегратки од неговите соученици

Младиот херој кој спаси 20 деца во пожарот во дискотеката „Пулс“ во Кочани, Јован Костадинов денесека беше пречекан од неговите соученици во Гимназијата „Ванчо Прке“ во Виница.

„Добро сум, закрепнав“, вели Јован додека се симнува од автомобилот и се движи кон неговите сооченици му оддадоа почит за неговото дело со громогласен аплауз, кои се ракуваа, прегрнуваа со него.

Дека Јован е пуштен од болница информриаше и министерот за здравство Арбер Таравари.

„Денеска, со длабока емоција и бескрајна гордост, ви ја споделувам веста дека Јован Костадинов, храбриот млад човек кој спаси 21 живот во трагедијата со пожарот во Кочани, конечно се врати дома.

Постојат моменти кога зборовите не се доволни, а ова е еден од нив. Како да се опише душа толку храбра и несебична, која во мигови на паника и опасност не помисли на себе, туку само на другите?

Јован, кој има само 19 години, постапил како вистински херој. Влегувал повторно и повторно, не еднаш, не двапати, туку повеќе од 20 пати, за да помогне на оние што биле заробени во пламените. Го ризикуваше сопствениот живот за да спаси други.

Неговото тело ги носи лузните од неговото јунаштво, но неговото срце носи нешто далеку поголемо: почитта, восхитот и љубовта на цела нација.

Јован не е само херој на Кочани. Тој е херој на целата наша држава. Симбол на тоа што значи да се стави човечноста над стравот. Потсетник за сите нас колку многу може да направи еден човек со големо срце.

Добредојде дома, Јован. Твојата приказна ќе живее вечно, во животите што ги спаси, во семејствата што повторно се заедно и во срцата на секој граѓанин што сега го знае твоето име.

Во име на сите граѓани, јас ќе кажам едно нешто, јасно и гласно: Никогаш нема да заборавиме“, напиша Таравари на Фејсбук.