Од што зависи колку долго ќе преживеат заробените во урнатините по земјотресот?

Колку долго заробените луѓе можат да преживеат во урнатините на земјотресот? До една недела или повеќе, велат експертите, но тоа зависи од нивните повреди, како се заробени и временските услови.

Тимовите за пребарување од целиот свет се приклучија на локалниот персонал за итни случаи во Турција и Сирија за да бараат жртви од разорниот земјотрес кој однесе илјадници животи.

Повеќето спасувања се случуваат во првите 24 часа по катастрофата. После тоа, шансите за преживување се намалуваат со секој изминат ден, велат експертите. Многу жртви беа тешко повредени или затрупани од камења или други остатоци.

Пристапот до вода и воздух се клучни фактори за опстанок, заедно со временските услови. Лошите зимски услови во Сирија и Турција ги попречија спасувачките напори, при што температурите паднаа многу под нулата.

„Нормално, ретко е да се пронајдат преживеани по пет до седум дена, а повеќето тимови за пребарување и спасување ќе размислат за прекин на операциите дотогаш“, рече д-р Џерон Ли, специјалист по медицина за итни случаи и катастрофи во Општата болница во Масачусетс.

„Но, има многу приказни за луѓе кои преживеале повеќе од седум дена. За жал, тоа се обично ретки и исклучителни случаи“.

Луѓето со трауматски повреди, вклучително и повреди од нагмечување и ампутации на екстремитетите, се соочуваат со најкритичниот период на преживување, рече д-р Џорџ Чампас, специјалист за итна медицина на Универзитетот Нортвестерн, пренесува Гласот на Америка.

„Ако не ги извадите за еден час, во тој златен час, имаат навистина многу мали шанси за преживување“, рече тој.

Оние со други болести, чие здравје зависи од лекови, исто така се соочуваат со лоши шанси, рече Чампас.

Возраста, физичката и психичката состојба се исто така важни фактори.

„Имаше и многу чудесни спасувања, луѓе кои преживеаја во ужасни услови“, рече д-р Кристофер Колвел, специјалист за итна медицина на Универзитетот во Калифорнија, Сан Франциско. „Тие обично се помлади луѓе и имале среќа да најдат или џеб во урнатините или некој начин да дојдат до воздух и вода.

По земјотресот и цунамито во Јапонија во 2011 година, еден тинејџер и неговата 80-годишна баба беа пронајдени живи по девет дена заробени во нивниот срамнет дом.

Една година претходно, 16-годишна девојка од Хаити беше спасена од урнатините на земјотресот во Порт-о-Пренс по 15 дена.

И менталната состојба може да влијае на преживувањето. Луѓето заробени покрај телата на жртвите, кои немаат контакт со други преживеани или спасувачи, може да изгубат надеж, вели Чампас.

„Ако имате некој жив, се потпирате еден на друг за да продолжите да се борите“.

Фото: Youtube - screenhsoot