Отпад насекаде по продолжените викенди во земјава: Македонија е убава земја, но граѓаните не се грижат за неа
Пандемијата од коронавирус ги затвори границите во земјава но и во целиот свет, постепено со попуштањето на мерките дел од границите се отворија за нашите граѓани, дел сеуште стојат затворени, односно наши граѓани не можат да патуваат во нив или само со негативен ПЦР Тест. Ковид-19 не погоди сите, но некако како и кај секое зло, така и со вирусот граѓаните станаа покреативни и изнајдоа повеќе начини за луфтирање од целата ситуација во којашто се најдовме.
На социјалните мрежи се појавија неколку групи преку кои се промовираа убавините на нашата земја, места кои досега не сме ги посетиле, места кои биле подзаборавени од граѓаните. А особено македонскиот Ерусалим, Охрид летово го посетија илјадници Македонци како дестинација за викенд но и дестинација за летување.
Охрид е убав, прекрасен град, среден, со преубави пејсажи. Природа која може да ја сретнете само таму, но и 365 цркви и манастири кои пленат со својата живост и спокој. Но, покрај сите овие божји убавини може да се видат купишта од ѓубре, отпад кој го оставаат туристите, некои го оставаат до кантата за отпадоци бидејќи истата е преполна а други намерно или не го фрлаат отпадот кај ќе им текне.
Еве веќе скоро 30 години. Јас не се сеќавам некогаш да видовме ваква слика кога туристи ни се кинези, холанѓани, италијанци и тн.
— Два терабајтниот (@Hard_diskot) August 1, 2020
Срамно. Жално. Бедно. pic.twitter.com/gUH3I1kwOj
Глетката секако не е убава, ниту за Охриѓани, ниту за туристите. Но, не се фрла отпад само во Охрид.
Граѓаните кои се активни планинари преку социјалната мрежа Твитер се пожалија за големата количина на отпад која што ја оставаат граѓаните откако ќе се прошетат низ планина. Таков пример е и отпадот кој за време на продолжениот викенд бил направен и оставен на планината, односно на местото викано Лешница.
Жива се јадам, како и повеќето мои пријатели планинари (ама планинари) што ви ја откривме Лешница.
— Бактерија (@EscherihiaColi) August 31, 2020
По секој викенд и празник ова ни го оставате.
Што проклетија од народ сте бе?
*Сликата е преземена од ФБ pic.twitter.com/PqWb4LLVmK
Планинарите се лути на себе што им го откриле овој рај на граѓаните. Апелираат отпадот да си го носат со себе до најблиската канта за отпадоци, да не се остава во планина. Да ја заштитиме планината, природата но и идните генерации.
Дел од планинарите кои се активни и редовни посетители низ нашите планини, дел од ѓубрето на несовесните граѓани го собираат во ќеси за отпад и го симнуваат од врвовите.
Ова е собрано вчера на Титов врв, повторно од пријател планинар, да стигнеш до Титов за да се олесниш и оставиш ѓубрето треба да си убер сељак! pic.twitter.com/8d0YIqk6tL
— Бактерија (@EscherihiaColi) August 31, 2020
Редовно за викенд се посетува и прекрасната Матка, а особено во петокот за време на големиот христијански празник „Успение на Пресвета Богородица“, голем број граѓани ја посетија црквата таму и се молеа за здравје и благослов од бога.
Сликата на терен по големиот промет на луѓе и таму е иста, смет на сите страни, околу кантите за отпадоци, под поставените клупи и маси за одмарање, но и по целата патека која води кон Матка.
Сведоци сме сите кога патуваме од една до друга дестинација дека низ патиштата во земјава редовно се среќаваат пластични шишиња, амбалажи од чоколада, па дури и делови од облека.
Активистите за зачувување на животната средина апелират да се чува природата, бидејќи таа ни е потребна нас повеќе отколку ние на неа.
Според Државниот завод за статистика минатата 2019 година се собрани 632.484 тони отпад, а во 2018-тата се собрани 625.386 тони смет. Бројките кои покажуваат дека отпадот во земјава се зголемува.
Фото: Твитер и Фејсбук
Р.М.М.
