Оваа земја нуди виза за 12 месеци, а можете да го донесете и вашето семејство: Кои се условите?

Кои се условите за добивање виза за дигитални номади во Словенија?

Добивањето виза за дигитален номад стана сè попопуларен начин за оние кои имаат среќа да можат да работат од далечина за да ја променат својата дневна рутина. Многу европски земји веќе ги имаат овие програми, а сега уште една земја се придружи на листата.

Овој пат зборуваме за Словенија, земја од Централна Европа позната по своите магични езера, прекрасни планини и опуштена атмосфера.

Визата за дигитални номади во Словенија ќе биде достапна од 1 ноември 2025 година и ќе им овозможи на успешните кандидати да останат една година. Клучниот услов е лицето да работи за компанија која не е регистрирана во Словенија, или како вработен, хонорарец или самовработен што нуди услуги на клиенти надвор од Словенија.

Граѓаните на земји надвор од Европската Унија и Европската економска зона (ЕЕА) ќе можат да аплицираат, а членовите на семејството можат да се приклучат, но под истите услови кога станува збор за вработување. Прекршувањето на правилата може да доведе не само до откажување на визата, туку и до забрана за влез во земјата во иднина.

Визата се издава за максимум 12 месеци и не може да се продолжи. Сепак, постои можност за повторно аплицирање, но само по шестмесечна пауза надвор од Словенија. Исто така, потребно е да докажете дека имате доволно приходи за живот преку плати, банкарски изводи или договори за вработување.

Кој друг нуди визи?

Сè уште не е познато дали ќе има минимален праг на приход или такси за виза, па затоа наскоро се очекуваат повеќе информации.

Заинтересираните ќе можат да аплицираат преку најблиската словенечка амбасада или директно во административната единица во Словенија, доколку веќе се наоѓаат во земјата, објавува „Економски тајмс“.

Со овој потег, Словенија ќе стане најновата членка на Европската Унија што ги отвора своите врати за дигиталните номади, со цел привлекување таленти и поттикнување на долгорочен туризам.

Земјата нуди поприфатливи трошоци за живот во споредба со некои други членки на ЕУ. Главниот град Љубљана е полн со коворкинг простори, шарени улици и богат ноќен живот, идеални за оние кои сакаат динамичен начин на живот.

Од друга страна, градови како Целје, Марибор, Крање и Копер нудат потивка средина, посоодветна за семејства.

Меѓу земјите кои исто така нудат виза за дигитални номади се Шпанија, Португалија, Хрватска, Грција, Исланд, Естонија, Грузија, Малта итн.