(ВИДЕО) Плач за чедата низ белиот свет - Ковид-19 во Струмичко ги оддалечи иселениците

Потиштени и разочарани зашто поради корона - кризата не можат да си ги видат децата. Вака ги затекнавме  Марија и Душан Голубови, најстариот брачен пар во подбеласичкото село Старо Коњарево. Погледот постојано им е вперен кон патот, чекаат да се случи чудо, да видат познато и сакано лице.

Ова населено место, со живописна природа и големи убави куќи, годинава најверојатно е најосаменото место во струмичкиот регион. Причина е пандемијата со КОВИД – 19 поради која иселениците од западноевропските земји не можат да си дојдат во родните куќи. Невообичаено за летниот период, нема речиси никакво движење низ населбата, иако во јули и август тука врие од народ.