Вонредно слетување на авион поради кобра под седиштето на пилот

Пилот во Јужна Африка принудно слетал кога под своето седиште открил змија.

Пилотот на малиот бизнис џет со четворица патници изјавил дека почувствувал „нешто ладно“ како лази по неговата нога и видел глава на голема кобра.

Откако се смирил, ги известил патниците за она што го пронашол и побарал дозвола од контролата на летот за итно слетување.

Контролата на воздушниот сообраќај ги повикала пожарникарската и спасувачката служба, брзата помош и специјалист за змии да бидат на аеродромот во централниот јужноафрикански град Велком кога авионот слетал.

Со змија околу нозете, пилотот летал со авионот уште 10 до 15 минути пред да слета.

„Постојано гледав надолу каде беше кобрата. Таа сè уште беше под седиштето. „Не се плашам од големи змии, но обично не им приоѓам“, рекол пилотот.

Персоналот на аеродромот кој бил сведок на слетувањето рекол дека патниците се симнале „видливо потресени“, но безбедни.

Се чини дека и кобрата е безбедна бидејќи не е пронајдена при претресот на авионот, ниту во околината.

Очигледно исплашен, иако не беше пронајдена змија, пилотот облекол густа зимска јакна за летот дома, завиткал ќебе околу седиштето и имал при рака противпожарен апарат во прав, спреј за бубачки и палка за голф.

Змијата „Кејп Кобра“, за која се верува дека влегла во авионот, е долга околу метар и половина и е една од најопасните во Африка поради смртоносниот отров што го испушта со каснувањето.